UWC ມາຮິນດຣາ ນຳໃຊ້ ຫຼັກສູດໃບປະກາດສະນີຍະບັດນາໆຊາດ (International Baccalaureate Diploma Program) ເຂົ້າໃນການສິດສອນ. ນອກຈາກວິຊາສາມັນສຶກສາທົ່ວໄປແລ້ວ, ທີ່ໂຮງຮຽນຍັງມີວິຊາສິລະປະກຳ,ວິຊາລະຄອນ, ວິຊາຮູບເງົາ, ວິຊາຈິດຕະວິທະຍາ, ວິຊາສາສະໜາໂລກ ແລະ ວິຊາການເມືອງໂລກ. ນອກຈາກນັ້ນ ຍັງມີໂຄງການຮຽນຮູ້ວັດທະນະທຳອິນເດຍ ເຊັ່ນ "ນີ້ແມ່ນອິນເດຍ" (This is India) ແລະ "ເຫດການທົ່ວໂລກ" (Global Affairs) ແລະ ການຄິດຢ່າງເປັນລະບົບຕາມຄວາມຊັບຊ້ອນຂອງວິທະຍາສາດ (Complexity science and system thinking).

UWC ມາຮິນດຣາ ຍັງມີຫຼັກສູດ Project Based Diploma (PBD) ລວມເຖິງ ຫຼັກສູດກຽມມະຫາວິທະຍາໄລຂອງມະຫາວິທະຍາໄລແຄມບິຈ (Cambridge Pre-University Diploma). PBD ເປັນຫຼັກສູດພິເສດທີ່ ນັກຮຽນໃຊ້ເວລາໃນຊ່ວງປີ1 ໃນການຮຽນຫຼັກສູດ IB ແລະ ປີທີ2 ເພື່ອຄົ້ນຄວ້າ ແລະ ພັດທະນາໂຄງການຄວບຄູ່ກັບການຮຽນ IB.

UWC ມາຮິນດຣາ ມີກິດຈະກຳນອກຫຼັກສູດທີ່ຫຼາກຫຼາຍບໍ່ວ່າຈະເປັນກິດຈະກຳທີ່ຄວາມຄິດສ້າງສັນ, ການເຄື່ອນໄຫວກິດຈະກໍາ, ການຊ່ວຍເຫຼືອສັງຄົມ ເຊິ່ງກິດຈະກຳນີ້ເອີ້ນວ່າ ແຄັດສ໌ (CAS), ຫຼື ເອີ້ນວ່າ ທຼິເວນີ (Triveni) ເຊິ່ງໄດ້ແບ່ງຂອບເຂດກິດຈະກຳອອກເປັນ 5 ກຸ່ມຄື ກຸ່ມການສຶກສາ, ກຸ່ມສັນຕິພາບ ແລະ ຄວາມຍຸດຕິທຳ, ກຸ່ມສິ່ງແວດລ້ອມ ແລະ ຄວາມຍືນຍົງ, ກຸ່ມການສື່ສານ ແລະ ວັດທະນະທຳ ແລະ ກຸ່ມການສຶກສາກາງແຈ້ງ. ນັກຮຽນຈະຕ້ອງໄດ້ເຂົ້າຮ່ວມຢ່າງໜ້ອຍໜຶ່ງກຸ່ມ.

ໂຄງການຊ່ວຍເຫຼືອສັງຄົມທັງພາຍໃນໂຮງຮຽນ ແລະ ຊຸມຊົນໃກ້ຄຽງແມ່ນເຮັດຜ່ານກິດຈະກຳ ທຼິເວນີ (Triveni), ລວມເຖິງການເຮັດວຽກຮ່ວມກັບ ອັກຊາຣາ (Akshara) ເຊິ່ງເປັນມູນນິທິພັດທະນາຊຸມຊົນທ້ອງຖິ່ນເຊິ່ງລວມມີການຊ່ວຍວຽກທີ່ໂຮງຮຽນທ້ອງຖິ່ນ, ສວນຜັກປອດສານພິດ ແລະ ອົງການຊ່ວຍເຫຼືອສັງຄົມຕ່າງໆ.

ນອກຈາກກິລາທົ່ວໄປດັ່ງ ບານບ້ວງ, ຣັກບີ້ ແລະ ບານເຕະແລ້ວ, ທີ່ຕັ້ງຂອງໂຮງຮຽນຍັງອຳນວຍຕໍ່ກິດຈະກຳກາງແຈ້ງຕ່າງໆ ເຊັ່ນ ກິດຈະກຳການເດີນປ່າ, ການຂີ່ລົດຖີບ ແລະ ກິດຈະກຳອາສາດັບເພີງ. ນັກຮຽນຈຳນວນຫຼາຍຍັງໄດ້ເຂົ້າຮ່ວມການແຂ່ງຂັນກິລາລະຫວ່າງຫໍພັກປະຈຳປີ ທີ່ນັກຮຽນເອີ້ນກັນວ່າ MUWCILympics (ມິວກີ້ລິມປິກ).

UWC ມາຮິນດຣາ ມີໂຄງການໄລຍະສັ້ນທີ່ຫຼາກຫຼາຍໃນຊ່ວງພັກແລ້ງ, ເຊິ່ງໄດ້ຮວບຮວມເອົາບັນດານັກຮຽນອາຍຸລະຫວ່າງ14 ເຖິງ 18 ປີ ຈາກທົ່ວໂລກມາສຶກສາກ່ຽວກັບບັນຫາຕ່າງໆທີ່ກຳລັງເກີດຂຶ້ນ ເຊັ່ນ ບັນຫາການພັດທະນາແບບຍືນຍົງ, ບັນຫາດ້ານໂລກາວິກາວິວັດ ແລະ ບັນຫາເລື່ອງເພດ. ຈຸດສຳຄັນແມ່ນແນໃສ່ການສ້າງຄວາມເຂົ້າໃຈໃຫ້ແກ່ນັກຮຽນ ແລະ ແນະນຳນັກຮຽນໃຫ້ຮູ້ຈັກເຖິງບັນຫາສຳຄັນຕ່າງໆ ໂດຍຜ່ານການໂອ້ລົມແລກປ່ຽນຄວາມຄິດ ກັບ ຜູ້ຊ່ຽວຊານ ພ້ອມທັງນຳໃຊ້ພື້ນທີ່ຂອງໂຮງຮຽນ ແລະ ສະພາບທາງດ້ານວັດທະນະທຳ. ໂຄງການ "ພົບກັບອິນເດຍ" (Encounter India) ແມ່ນໂຄງການພັກແລ້ງທີ່ມີຊື່ສຽງຂອງໂຮງຮຽນ, ກິດຈະກຳຂອງໂຄງການນີ້ລວມມີການສ້າງສາ ແລະ ຮຽນຮູ້ວັດທະນະທຳ ຢູ່ UWC ມາຮິນດຣາ ເປັນເວລາໜຶ່ງອາທິດ ແລະ ອີກ 2 ອາທິດ ແມ່ນ ການທ່ອງທ່ຽວເພື່ອຮຽນຮູ້ເຂດຕ່າງໆຂອງປະເທດອິນເດຍ. ນອກຈາກນັ້ນ, ກໍຍັງມີໂຄງການອື່ນໆອີກ ເຊັ່ນ ຊາວໜຸ່ມ, ສິ່ງແວດລ້ອມ ແລະ ຄວາມຍືນຍົງ (Youth, Environment and Sustainability) ແລະ ການລະຄອນ, ເພດ, ເອກະລັກ ແລະ ຮູບເງົາ (Theatre, Gender, Identity and Film).

ນັກຮຽນອາໄສຢູ່ນຳກັນທີ່ບໍລິເວນທີ່ພັກອາໄສເຊິ່ງປະກອບດ້ວຍ 5 ຫໍພັກ ເອີ້ນວ່າ ວາດາ (Wada) ມີຄວາມໝາຍໃນພາສາທ້ອງຖິ່ນວ່າ ເດີ່ນບ້ານ. ພາຍໃນໂຮງຮຽນຍັງມີສະຖານທີ່ຫຼາຍບ່ອນສຳລັບນັກຮຽນເພື່ອພົບປະ, ພັກຜ່ອນ ແລະ ເຮັດກິດຈະກຳຮ່ວມກັນ. ມີເສັ້ນທາງສຳລັບການເດີນປ່າ ແລະ ປີນພູ ແລະ ອີກຫຼາຍສະຖານທີ່ ທີ່ເປັນທີ່ຮູ້ຈັກກັນດີໃນກຸ່ມນັກຮຽນ ໃນການຊົມທິວທັດເວລາຕາເວັນຕົກດິນ.

ທາງດ້ານການຮຽນ, ຫ້ອງຮຽນແມ່ນຢູ່ອີກຟາກໜຶ່ງຈາກເຂດທີ່ພັກ, ຫ້ອງທົດລອງວິທະຍາສາດ, ຫ້ອງອຸປະກອນດິຈິຕອນ, ຫ້ອງສະໝຸດ, ຫ້ອງສິລະປະ, ອຸປະກອນສຳລັບການລະຕອນ ແລະ ການເຝິກຊ້ອມດົນຕີ, ເດີ່ນກິລາທີ່ກວ້າງຂວາງສຳລັບ ຣັກບີ້, ບານເຕະ, ບານບ້ວງ ແລະ  ຄຣິກເຄັດ(cricket) . ທີ່ສູນພັກຜ່ອນກໍຍັງມີ ຫ້ອງອອກກຳລັງກາຍ, ສະລອຍນ້ຳ, ເຄື່ອງຫຼິ້ນເກມ ແລະ ຮ້ານຂາຍອາຫານຫວ່າງ. ນອກຈາກນັ້ນ, ໂຮງຮຽນກໍ ຍັງມີຫ້ອງອາຫານທີ່ເອີ້ນວ່າ ຄາຟ (Caf) ທີ່ເສີບອາຫານແກ່ນັກຮຽນສາມຄາບຕໍ່ມື້.

UWC ມາຮິນດຣາ ຕັ້ງຢູ່ເຂດຄຸ້ມຄອງພັນພືດ ແລະ ພັນສັດ ທີ່ມີພື້ນທີ່ 170 ເອເຄີ (170-acre) ທີ່ ເວດສ໌ເຕີ້ນ ຫັດ (Western Ghat), ເຊິ່ງເປັນສາຍພູທີ່ຕັ້ງຂະໜານກັບຊາຍທະເລທາງດ້ານທິດຕາເວັນຕົກຂອງມະຫາສະໝຸດອິນເດຍ. ຍ້ອນບັນດາໝູ່ບ້ານ ແລະ ຊຸມຊົນທີ່ຢູ່ຕີນພູ, ມັນເຮັດໃຫ້ນັກຮຽນໄດ້ມີໂອກາດຮຽນຮູ້ ແລະ ມີສ່ວນຮ່ວມກັບຊຸມຊົນຫຼາຍຂຶ້ນ. ຕົວເມືອງປູເນ ແມ່ນຢູ່ຫ່າງຈາກໂຮງຮຽນ 30 ກິໂລແມັດ, ເຊິ່ງນັກຮຽນສາມາດເດີນທາງໄປຈັບຈ່າຍໃຊ້ສອຍໃນຊ່ວງວັນເສົາ - ອາທິດໄດ້. 

ນັກຮຽນສາມາດສະໝັກຜ່ານຄະນະກຳມະການ UWC ປະຈຳຢູ່ແຕ່ລະປະເທດ ຫຼື ຜ່ານ UWC Global Selection Programm. ສຳລັບຂໍ້ມູນເພີ່ມເຕີມກ່ຽວກັບ UWC ມາຮິນດຣາ, ສາມາດຕິດຕາມໄດ້ທີ່.